Stracci di Mimoria

 
Nienti chè u nomu dici dighjà a soia : l’Alta Rocca ! Ci si senti un muscu pitricosu. Ci si vidi un arghjentu ind’iddu si spiriighja u soli. Ci si senti l’oru di i foli vechji. Ci si tocca a paura di veda affaccà calchì salvaticu dimoniu da a fumaccia. Ci si tasta l’arba barona è l’acqua cutrata di calchì piscia, chì vi pudaria ancu truncà i denti da u fritu.
 
I me loca, i me loca mondu… Avvinti tanti volti chì ùn possu essa chè di quì.
I licci è viola di u Pianu. San’Larenzu à torru à Capula… Iè chì semu isciuti da chivi, no’altri… Semu buttati à nantu à issu paltricciu. Quissa a mi dici a me carri. A mi contani i me mimorii...
 
...Tutti issi stracci di mimoria sò i stracci di l’essa meiu. È cù issi stracci chivi, mi vestu à panni ripizzati. Ma quissi, ni socu sicuru, è quissi soli, sò i mei !