Duie Rime

 
Duie Rime hè una racolta di puesie scritte in lingua corsa da Paul-Vincent Mucchielli.
 
Duie Rime est un recueil de poèmes écrit en langue corse par Paul-Vincent Mucchielli.
 
NANNA PER LUCIA STELLA
 
Dormi tù Lucia Stella
Serena a mo Cara zitella
Fora luce piena luna
Face à tè celu di furtuna
È l’alta onda stillata
Dà aiutu à l’azzigata

L’acelli sò appullati
Si sò tutti addurmintati
Avà spintu hè ogni locu
Tuttu hè più brusta cà focu
È l’alta onda stillata
Dà aiutu à l’azzigata

Ùn trema mancu una fronda
In quella beata stonda
È i lupi cù l’agnelli
Appaciati da fratelli
È l’alta onda stillata
Dà aiutu à l’azzigata

In la notte a più bughjosa
Sì tù stella luminosa
Chì affacca à fà mi lume
In lu to lettu di piume
È l’alta onda stillata
Dà aiutu à l’azzigata

Quandi l’alta onda stillata
Da u turchinu rimpiazzata
Vogliu chì di sole un rasgiu
T’accarezzi cum’è un basgiu
Ma sta sera u mo curucciu
Dormi in lu to lettucciu.